مباراة التعليم بالتعاقد
#هـــــــام للناس ديال التعاقد:
كيفاش تحضر للاختبار الشفوي و تزطط راسك و تعرض الدرس قدام اللجنة :
شـــــــوف(ي):أ ول حاجة حاول(ي) توجدو من دبا حينت من بعد نتائج الكتابے غايكون عندكم غے يوم أو يومين باش توجدو مهم ماضغطش على راسك بزاف طبيعي ايكون ارتباك و تخوف فهاد ايام امر عادي جدا ولكن مرة مرة تمرن(ي) كيف تغلب على هاد التوتر قبل ما دخل لقاعة الاختبار،
و هادي بعض خطوات يمكن تفيدك في الاستعداد للاختبار.
- 1 خود(ي) شي درس من دابا على حسب شنو غادوز الى كنتي ابتدائي خوود شي نموذج جذاذة درس في ابتدائي او جذاذة درس في اعدادي او ثانوي على حسب تخصصك، راه عطا الله الجذاذات غير لي مابغا، حاول تحفظ مراحل الدرس من الأول تال الأخير حفظها ؤ كردها مزيان حيث نهار الاختبار في الغالب ايعطوك احد الكتب المدرسية و تم غاتصوب نموذج جذاذة ديال شي درس ؤ ماعرفت واش هوما ايحددوا ليك الدرس ولا نتا،
ماعلينا نتا من دابا وجد شي واحد مزيان و عرف طريقة باش تصاوبو و قرا شوية على تعريف الجذاذة و اهميتها و على التخطيط و اهميته راه موجود هادشي فسوق گوگل غير بحث، خود فكرة عامة عليهم حيث يقدر تسول فيها.
- 2 ملي دخل للقاعة سلم عليهم ماتصافحهمش ؤزيد معاها شوية د الابتسامة ^__^ ماشي الضحكة و لبس مزيان داك نهار لباس رسمي و شوية د ريحة بدون تكلف مهم كون متوسط ؤ تبوگص عليهم ؛) حيث كايشوفوا تا الهندام ديالك و قاد تحسينة الشعر(راك غاتولي أستاذ)
- 3 ملي تسلم عليهم غالبا اول سؤال عرفنا براسك عرف براسك بشكل مختصر و هدر باللغة العربية الفصحى و بصوت مسموع
[إسمي ...... مزداد بمدينة .. أقطن حاليا بمدينة .. حصلت على شهادة البكالوريا في شعبة ...بثانوية و تابعت دراستي الجامعية بجامعة .. و حصلت فيها على شهادة الاجازة الأساسية في تخصص .. و كان موضع بحثي .. و حصلت على شهادة ..]
المهم هنا حاول ما امكن ذكر داكشي اللي عندك و ضابطو، مادكرش شي حاجة اللي تجبد ليك صداع البحث الى ماكنتيش ضابطو مزيان ماتقولش گاع و "كان موضوع بحثي" و لا ضابطو دكروا باش نيت يسولوك فيه و تربح شوية د النقط و الثقة في النفس قبل ماتجي الاسئلة الاخرى.
- 4 ملي غاتبدا تعرف براسك اتلاحظ ان التوتر بدا كايمشي خليك هاكا و في نفس الوقت توقع اي استفزاز من اي واحد ف لجنة غير باش يشوش عليك يقدر يطرح عليك شي سؤال و يقولك ونتا مجاز و ماعرفش هادي و لا بحال هاكا نتا هنا تهدن و عرف سؤال مهم نتا بدا غادي ؤ ضبط اعصابك حيث الى مشيتي معاه في الطرح ايطيحك في الفخ و غاتبدا توتر و غايأثر عليك في الاجوبة.
- 5 على حسب توصيف الاختبار الشفوي في الغالب ايعطوك توجد درس يعني يعطوك كتاب ونوجدوا تما ملي توجدوا و تجي عندهم باش تلقي مقطع من درس اتبدا بسم الله الرحمان الرحيم و غاتلقي تحية السلام عليكم ادير راسك بحال الى ثلامذ كاينين في القسم واخا القاعة خاوية مهم هوما بغاو يشوفوا طريقتك في الالقاء و التحرك في القسم ,
تجنب طرح على اللجنة اسئلة كانهم تلامذ حيث يمكن يحرجوك بشي سؤال وانما طرح سؤال بحال الى تلامذ كاينين و بدا تهدر بحال الى تلامذ كايتفاعلوا معاك نعم نعم صحيح من يؤيد هذا الجواب نتا ولدي جوواب صحيح احسنت و بقا طرح اسئلة مهم بان انك كاتشرك متعلم في بناء الدرس ماتكونش نتا اللي كتهدر بزاف و في نفس الوقت توقع اي حاجة من لجنة يقدر يديروا ليك شغب و لا يستفزوك و وجد الرد المناسب. مثال: درس في مادة التربية الاسلامية السنة اولى اعدادي.
《العقيدة الصحيحة و العقائد الفاسدة》
-أول حاجة غاديرها هي تقويم تشخيصي ؤ
الغرض منو أن يستحضر المتعلم المكتسبات السابقة، هنا الأستاذ اش كايدير: - يطلب إغلاق الدفاتر و المقرر - يطرح الأسئلة لتذكر الدرس السابق و التلميذ يغلق الدفتر و المقرر- يسمع و ينصت و يجيب عن الأسئلة بناءا على معارفه السابقة. -ثاني حاجة: الوضعية المشكلة ؤ الغرض منها القدرة على الإنتباه والمشاركة الفعالة في بناء الدرس ؤ هنا الاستاذ آش كايدير !!؟ صياغة الوضعية وعرضها و التلميذ ينصت ويشارك في حل الوضعية ويستفيد من باقي الزملاء *مثال وضعية مشكلة: {ابراهيم تلميذ مجتهد ، في الأسبوع الماضي أصابته وعكة صحية فاتجه رفقة والدته إلى ضريح ( سيدي عبد الرحمن) معتقدا أن هذا الولي المدفون فيه يستجيب للمحتاجين وقادر على علاجهم} .
ماهي شخصيلت الوضعية
ما هو الإشكال الموجود في هذه الوضعية؟
ما رأيك في هذا الاعتقاد؟ وما سببه؟ وكيف يعالج؟ من بعد ماكطرح وضعية مشكلة كتاخد فرضيات من عند التلامذ سواء الصحيحة او الخاطئة و كتكتبهم في السبورة في الجانب الايسر خود جوج او ثلاثة صحيحة و الخاطئة و ماتجاوبش عليهم حيث الدرس اللي غايجاوب عليها
من بعد قراءة النصوص و ثوثيق النصوص و الشرح و استخراج مضامين النصوص ثم تحليل محاور الدرس و كاتختم بتقويم اجمالي .
- 6 الخلاصة ديال تدبير مقطع من درس انك دير درس عادي بحال الى لجنة ماكيناش و حيد توتر و عرف كيف تحرك في القسم ووزع النظرات داخل القسم و ماتنساش تكتب تاريخ و عنوان الدرس في السبورة ونتا كادير درس توقع شي اسئلة من لجنة بحال: مواصفات الاستاذ الناجح ؟ مواصفات الدرس الناجح ؟
كيف تتعامل مع الطفل المشاغب و الخجول؟ ماهي الوثائق الضرورية التي ينبغي ان يتوفر عليها الاستاذ؟ بحال الجذاذات+دفتر النصوص البرامج و التوجيهات التربوية، هاد الأجوبة يكفي تبحث ف گوگل غاتلقاهم أو شوف فالگروپ راه ديجا محطوطين.
- 7 الى تطرح عليك سؤال ونتا ماعرفوش قول لا ادري و غايعطوك سؤال اخر حسن من انك تبقا دور في حلقة مفرغة و تفرش راسك اللهم ماعارفش(عادي) قولها من الأول حتى الى استفزوك ماتأترش ؤتبدا تحمار قدامهم، العلم الكامل لله سبحانه.
- 8 ؤ ملي تسالي ماتصافحهومش خود بطاقة وطنية ديالك ؤ إلى كان شي توقيع وقع ماكانش إنصرف ؤضرب لباب ؛) .
- 9 شوف سييير للإختبار و دير في بالك أنك ماغاتخسر والو هاكا غايخفاف الضغط عليك ؤ اللي ليها ليها ياربحة يادبحة. نجحتي هو هاداك مانجحتيش مازال اندك فرص اخرى اصلا هاد مباراة تعاقد ماكانتش، عاد ولات يعني ماكانتش من قبل بحال شي حاجة تزات جابها الله مرحبا ماجابش لعله خير.
الله يوفق الجميع و الله يسمعنا أخبار الخير .
#
ليست هناك تعليقات
ملحوظة: يمكن لأعضاء المدونة فقط إرسال تعليق.